Musik

Spotify Kanal von Frau Sommer:

https://open.spotify.com/artist/3TDXmhx8c3ktJZBQnwiVR6?si=0pR5wyhUT9ip53y3i2I8mw

 Songtexte

di magischi Frou - Frau Sommer

I ha kört äs gäbi ä Frou im Seeland
mit me grosse magerä schwarzä Hund.
U si luufi mit däm Hund dür d Wälder
wo si zu ihrnä gheimä Plätzli chunnt.

U di Frou di redi mit dä Tierli
wo si chrützt uf ihrem Wäg dür d Büsch.
U di Tierli di chöme gärn cho spienzle,
we si merkä das d Frou mit em Hund umen isch.

di magischi Frou
di magischi Frou
i dä Wälder vom Seeland triffsch sä a.

we me se fragi, was säge de all di Tierli?
luegt siä dig a u lächlet ganz konfus.
wieso mier andrä di Tierli ned verschtöndä,
ob mier ned lose, da chunnt si ned ganz drus.

si siit mi müessi doch nume ganz ganz lislig
u mit offnigem Härze di Tierli empfa.
u d Natur und alli Seelä ehrä
u ganz achtsam u sanft dür ds Läbe ga.

di magischi Frou
di magischi Frou
i dä Wälder vom Seeland triffsch sä a.

u wed im Summer äsmal im Seeland wandrisch,
bisch ime Wald, de häb ächli Geduld.
Vlich hesch ja Glück u de chunnt si scho gli umen Eggä,

di Frou mit em grosse, magere schwarze Hund. 

Ä Fisch ohni See

Ä Fisch ohni See
was wer dr Milan ohni dr Wind?
di jungi Mueter ohni ihres Chind?
äs Huus ohni äs Dach?
ä alti Mühli, ohni ihrä Bach?
was si mier Menschä ohni Gfüel?
were mier hert wie alti Schtüel?
oder trochä wie Wüeschtäsand,
u nehmä mier änand no ar Hand?
i binä Fisch ohni See
ä Winter ohni Schnee
sit denn dasi kiner Träne me ha
sit denn dasi di ha müesse la ga.
ha Gfüel nie gschpart uf däm längä Wäg,
u vili Träne brucht a dänä Täg.
bis kiner me si cho
i bi ganz leer gsi, s' het mer mini Träne gno.
i binä Fisch ohni See
ä Winter ohni Schnee
sit denn dasi kiner Träne me ha
sit denn dasi di ha müesse la ga.
so isches guet ier liebä Lüt
chönnt ier no brieggä, vilich grad hüt
will diä wo kiner Träne me hii
si diä wo no vil truuriger si
i binä Fisch ohni See
ä Winter ohni Schnee
sit denn dasi kiner Träne me ha
sit denn dasi di ha müesse la ga.